Blog

O fis Medi 2025 ymlaen, bydd y TGAU dwy haen newydd yn cael ei addysgu yng Nghymru. 

Mae mathemateg.com wedi'i ddiweddaru'n ddiweddar i gynnig adnoddau ar gyfer y cwrs hwn.

Mae'r ddogfen hon yn cyflwyno ein cynllun gwaith llawn ar gyfer y cwrs newydd.

Mae'r ddogfen hon yn mapio ein darpariaeth i'r fanyleb TGAU newydd. (Glas = blwyddyn 7; Coch = blwyddyn 8; Gwyrdd = blwyddyn 9; Piws = blwyddyn 10; Melyn = blwyddyn 11.)

Mae'r daenlen hon yn mapio'r cynllun gwaith i'r unedau 1, 2 a 3 newydd.

Dyma fideo'n crynhoi cynnwys yr holl becynnau gwaith:

Mae gennym gyrsiau newydd ar gyfer blynyddoedd 7 i 11, gydag adnoddau wedi'u trefnu ar y tudalennau canlynol:

Blwyddyn 11 Haen Uwch
Blwyddyn 11 Haen Sylfaenol
Blwyddyn 10 Haen Uwch
Blwyddyn 10 Haen Sylfaenol
Blwyddyn 9
Blwyddyn 8
Blwyddyn 7

Os ydych yn newydd i'r adnoddau, maent wedi'u trefnu i 30 o becynnau gwaith. Er enghraifft, y trydydd pecyn ym mlwyddyn 10 yw "Mesur Siapiau 3". Mae pob pecyn efo'r adnoddau canlynol yn gysylltiedig:

• Y pecyn gwaith ei hun, ar gael yn Gymraeg ac yn Saesneg. Mae fersiynau Microsoft Word, y gellid eu golygu, ar gael ar dudalen y flwyddyn berthnasol.
• Pecyn tasgau ychwanegol, ar gael yn Gymraeg ac yn Saesneg. Mae'r pecyn yma'n adolygu gwaith blaenorol gan ddefnyddio cwisiau; parau Enghraifft-Ymarfer; cwestiynau heb nod; cwestiynau diagram Venn; a chwestiynau "SSDD".
• Pecyn o gwestiynau "Profion Pop", ar gael yn Gymraeg ac yn Saesneg, i adolygu pennod o'r pecyn gwaith ar ôl ei gwblhau.
• Rhestr chwarae o fideos adolygu ar YouTube i grynhoi'r testunau yn y pecyn gwaith.
  
• Cwis amlddewis ar wefan Diagnostic Questions, ar gael yn Gymraeg ac yn Saesneg. (Mae angen cofrestru i ddefnyddio'r wefan hon, ond mae yn rhad ac am ddim i'w ddefnyddio.)
• Setiau o hen gwestiynau arholiad. Ar gyfer y pecyn Mesur Siapiau 3, mae setiau ar gael ar gyfer Trigonometreg; Helaethiad; Siapiau Cyfansawdd; a Hyd Arc ac Arwynebedd Sector.

Dyma grynodeb o'r newidiadau mwyaf i'r pecynnau gwaith.

• Terminoleg newydd: Mae 'buanedd' wedi'i newid i 'cyflymder' ym mhob man, a 'cyflymder' i 'felosedd'. Mae'r effaith fwyaf yn y pecynnau Symud efo'r Sphero (blwyddyn 9) a Datblygu Algebra 4 (blwyddyn 11).
• Mae'r testunau canlynol wedi'u dileu:
• Trawsfudiadau efo fector colofn (Croeso i Ysgol y Creuddyn, Cyfesurynnau yn y Pedwar Pedrant, Mesur Siapiau 4).
• Nodiant Set diagramau Venn (Ffactorau a Lluosrifau).
• Darganfod y perpendicwlar o bwynt i linell (Symud efo'r Sphero).
• Hanerydd perpendicwlar a hanerydd ongl efo cwmpas (Symud efo'r Sphero).
• Graffiau esbonyddol (Pwerau ac Israddau).
• Lluniadu a dehongli graffiau o'r ffurf \(y = ax + b + \frac{c}{x}\) a \(y = k^x\). (Pwerau ac Israddau).
• Dimensiynau (Mesur Solidau).
• Brithweithiau (Mesur Siapiau 4).
• Trawsffurfiadau Graffiau (Datblygu Algebra 4).
• Mae'r testunau canlynol wedi'u hychwanegu:
• Llunio trionglau efo onglydd a chwmpas (Cyflwyno Onglau).
• Deunydd ychwanegol ar forgeisi; slipiau cyflog; benthyciadau; cyfriflenni banc; cynlluniau ariannu (Gweithio efo Arian).
• Hanerydd perpendicwlar a hanerydd ongl efo onglydd (Symud efo'r Sphero).
  
• Dulliau graffigol i ddatrys hafaliadau cwadratig a chiwbig (Pwerau ac Israddau).
• Gwerthoedd canolraddol graff llinell; achosiaeth mewn diagram gwasgariad; ehangu cromfach llinol efo cromfach cwadratig; trawsnewid unedau arwynebedd a chyfaint (Diwedd Blwyddyn 11).
• Mae'r testunau canlynol wedi'u haddasu:
• Samplu systematig a haenedig (i adlewyrchu cynlluniau marcio CBAC) (Trin Data ac Ystadegaeth 4)
• Gwybodaeth am fformat yr arholiadau (Ffracsiynau, Canrannau a Degolion).

Yn ogystal, mae'r newidiadau canlynol wedi'u gwneud i fformat y pecynnau a'r fideos adolygu:

• Mae'r brandio wedi newid o ddefnyddio dolen yr hen Twitter i ddolen TikTok.
• Mae'r fformat ar gyfer labelu'r fideos adolygu ar YouTube wedi newid. Dyma fideo yn egluro'r newidiadau:
  
• Mae'r codau QR i gyd wedi'u diweddaru (roedd rhai o'r hen rai wedi stopio gweithio).
• Mae'r deunydd 'rhifedd' (er enghraifft pecynnau rhifedd, pecynnau gwaith cartref rhifedd) wedi symud i waelod y tudalennau ar gyfer pob blwyddyn unigol. 

Mae gwerslyfrau ar gyfer pob blwyddyn i'w gweld ar y dudalen hon. 

Mae atebion llawn ar gyfer y deunyddiau, ynghyd a phrofion diwedd uned; arholiadau diwedd blwyddyn; ffug arholiadau TGAU; atebion i becynnau hen gwestiynau arholiad; a mwy, ar gael ar gais: llenwch y ffurflen hon i ofyn am fynediad (os ydych wedi derbyn mynediad o'r blaen, bydd rhaid gofyn eto i gael mynediad i'r holl adnoddau newydd).